Хореография академиясында Шара Жиенқұлова атындағы VI Республикалық қазақ биі конкурсы басталды
Бүгін Қазақ ұлттық хореография академиясында Шара Жиенқұлова атындағы VI Республикалық қазақ биі конкурсының салтанатты ашылуы өтті.
Конкурсқа би форумына қатысу үшін 34 өтінім қабылданды. Қатысушылар арасында Қазақстанның барлық өңірлерінен 19 ансамбль мен 15 солист, дуэттер бар, олардың репертуарында еліміздің қазақ биі көрініс тапқан.
Шара Жиенқұлова атындағы VI Республикалық қазақ биі конкурсын Қазақ ұлттық хореография академиясы екінші рет өткізіп отыр. Қазылар алқасының құрамында биылғы жылы ҚазКСР Халық әртісі Талпақова Гүлжан Ізімқызы (қазылар алқасының төрағасы), Әзірбайжан Республикасының Халық әртісі Мурадова Тарана Гусейнқызы, Қазақстан Республикасының Еңбек сіңірген қайраткері Авахри Мукарам, Қазақстан Республикасының Еңбек сіңірген қайраткері Есекеев Абдрасул Нәжімеденұлы бар.
Байқау бағдарламасында көрермендер мен қатысушылардың назарына Шара Жиенқұловаға арналған бірегей фотоальбомның тұсаукесері ұсынылады: кітапта ұлы бишінің сирек кездесетін фотосуреттері, ал QR кодтары Қазақ ұлттық хореография академиясында 2016 жылдан 2022 жылға дейін қойылған билердің бейнежазбаларын жаңғыртуға мүмкіндік береді. VI конкурстың бағдарламасы Анвара Садықов мен Алмат Шәмшиевтің шеберлік сыныптарымен, Ш. Жиенқұлованың шығармашылығын зерттеуші – белгілі педагогтар мен ғалымдар К.Н. Бейсенова және Т.О. Ізімнің дәрістерімен, қазақ биінің алдыңғы бес байқауының материалдар көрмесімен қызықты.
Бұл кездесулер Қазақ ұлттық хореография академиясында өтеді. Ұжымдар мен солистердің қойылымдары, қазақ биінің Гала-концерті «Астана Балет» театрының сахнасында өтеді.
Шара Жиенқұлова атындағы VI Республикалық қазақ биі конкурсы қарсаңында хореографиялық жұртшылықтың күтулері әбден түсінікті: конкурс көрермендерді заманауи репертуармен және ұлттық бидің даму үрдістерімен, хореографтардың жаңа ізденістерімен таныстырады, жарқын орындаушыларды анықтауға, шығармашылық жетістіктермен және кәсіби тәжірибемен алмасуға мүмкіндік береді.
