28 наурыз күні Загир Исмагилов атындағы Уфа мемлекеттік өнер институтының ұйымдастыруымен «Халық биі. Өңірлік ерекшеліктер» атты Бірінші халықаралық ғылыми-тәжірибелік конференция өтті. Шараға Татарстан, Башқұртстан, Удмуртия және Ресейдің өзге де аймақтарынан хореография мен өнертану саласындағы танымал қайраткерлер қатысты.
Уфа өнер институтының хореография өнері кафедрасының меңгерушісі, Башқұртстан Республикасының еңбек сіңірген өнер қайраткері Олия Галеева Вильданованың шақыруымен конференцияға Қазақ ұлттық хореография академиясы қатысты. Академия онлайн форматта «Қазақ биінің негізгі қимылдары» тақырыбында шеберлік сағатын өткізді.
Шеберлік сағатын балетмейстерлік өнер кафедрасының аға оқытушысы Садыкова Анвара Ариповна жүргізді. Сабақ барысында қазақтың дәстүрлі әйелдер және ерлер биіндегі жиі орындалатын негізгі элементтер мен қимылдар көрсетілді.