Сайт бойынша іздеу
Қазақ ұлттық хореография академиясы Қазақ ұлттық биінің ғылыми-әдістемелік зертханасы

2025 жылдың 26 ақпанында Қазақ ұлттық хореография академиясында ЖОО оқытушыларына арналған «Қазақ биін оқытудың теориясы мен әдістемесі» тақырыбында дәстүрлі IV Республикалық семинар өтті.

Семинардың басты мақсаты – еліміздің жоғары оқу орындарында «Қазақ биін оқытудың теориясы мен әдістемесі» пәнінен сабақ беретін оқытушылардың өзара тәжірибе алмасуына жағдай жасау.

Қазақ биін оқыту дәстүрі еліміздегі бірнеше іргелі оқу орындарында қалыптасқан. Атап айтқанда, Махамбет Өтемісов атындағы университетте хореография мамандығы 1991 жылдан бастап, ал Қорқыт Ата атындағы Қызылорда университетінде 1993 жылдан бері оқытылып келеді. Бұл оқу орындарының түлектері бүгінде Қазақстанның түкпір-түкпірінде еңбек етіп жүр. Осы себепті семинарға аталған жоғары оқу орындарының білікті оқытушылары шақырылды.

Семинар барысында Қорқыт Ата атындағы Қызылорда университетінің «Дәстүрлі музыка өнері және хореография» білім беру бағдарламасының оқытушысы Юлдашева Жібек Байұзаққызы, Махамбет Өтемісов атындағы Батыс Қазақстан университетінің «Хореография» бағдарламасының оқытушылары Амреева Толқын Мағзұмқызы мен Қалжанова Арай Болатқызы өз тәжірибелерімен бөлісті. Қатысушылар назарына станок және залдың ортасындағы сабақтар көрсетіліп, жан-жақты талқыланды.

Сондай-ақ семинар жұмысында педагогика ғылымдарының докторы, профессор А.К. Кульбекова, педагогика ғылымдарының кандидаты Б.С. Тлеубаева, PhD докторы А.Т. Молдахметова өз ойларын талқыға салып, ойларымен бөлісті.

Семинар аясында қазақ биін оқытудың өзекті мәселелері, әдістемелік тәсілдері мен жаңа педагогикалық технологиялар талқыланып, кәсіби пікір алмасу алаңы ұйымдастырылды.