Бүгін Қазақ ұлттық хореография академиясына өнер және әртістерді даярлау саласындағы Оңтүстік Кореяның жетекші оқу орындарының бірі – Hanlim Arts High School делегациясы ресми сапармен келді. Сапардың басты мақсаты – хореография өнері саласындағы мамандарды даярлаудың қазақстандық жүйесімен танысу және екіжақты ынтымақтастықтың келешегін талқылау болды.

Шетелдік делегация құрамына Hanlim Arts High School тең құрылтайшысы әрі сыртқы ынтымақтастық жөніндегі директоры Ли Сан Джун, сондай-ақ өнер факультетінің деканы Хо Нам Джин кірді. Қонақтарға Академияның материалдық-техникалық және шығармашылық базасы бойынша егжей-тегжейлі таныстыру экскурсиясы ұйымдастырылды. Оңтүстіккореялық мектеп өкілдері балет залдарын, креативті арт-зертхананы, тұрғын үй корпусын, медициналық блокты, балалар кітапханасын, музей және бассейні бар заманауи спорт кешенін аралап көрді.

Ли Сан Джунның айтуынша, сапардан алған басты әсер – Академияның жоғары деңгейде жабдықталуы және тәрбиеленушілер үшін толық циклді жағдайдың жасалуы болды. Ол автономды кампустың бұл бірегей форматы оңтүстіккореялық тәжірибеден түбегейлі ерекшеленетінін атап өтті.

«Біз Академияның материалдық-техникалық жабдықталуына шынайы таңғалдық. Мұнда балаларды оқыту, тұруы және жан-жақты дамыту үшін – кәсіби залдардан бастап жеке медициналық орталық пен бассейнге дейін толық цикл жасалған. Оңтүстік Кореяда мұндай ауқымды автономды кампустарды құру тәжірибесі кең таралмаған, сондықтан бізге сіздердің тәсілдеріңізбен танысу өте қызықты болды. Бар-жоғы 10 жыл ішінде осындай жоғары нәтижелерге қол жеткізгендеріңіз таңғалдырады», - деді ол.

Сапардың қорытынды кезеңі Hanlim Arts High School өкілдерінің Қазақ ұлттық хореография академиясының ректоры Бибігүл Нүсіпжановамен ресми кездесуі болды. Келіссөздер аясында тараптар кәсіби хореографиялық білім беруді дамытудың өзекті мәселелерін, тәжірибе алмасуды және бірлескен жұмыстың әлеуетті бағыттарын талқылады.