Қазақ ұлттық хореография академиясы мәдениет және өнер саласы үшін жоғары білікті кадрлар даярлау мүмкіндіктерін кеңейтуді жалғастыруда. Қазақстан Республикасы Ғылым және жоғары білім министрлігінің Жоғары білімді дамыту ұлттық орталығы 8D02105 – Арт-менеджмент (бейіндік докторантура) жаңа білім беру бағдарламасын мақұлдап, оны Жоғары білімнің бірыңғай платформасының Білім беру бағдарламалары тізіліміне тіркеді.

Жаңа білім беру бағдарламасының ашылуы Академияның дамуындағы маңызды кезең болып табылады және мәдениет саласының шығармашылық жобаларды тиімді басқара алатын, заманауи басқару шешімдерін енгізетін, креативті индустриялардың тұрақты дамуын қамтамасыз ететін жаңа буын басшыларына деген сұранысын көрсетеді.

Бағдарлама стратегиялық басқару, мәдени саясат, жобалық менеджмент, көшбасшылық, цифрлық трансформация және өнер ұйымдарын дамыту бағыттары бойынша заманауи құзыреттерге ие жоғары білікті, тәжірибеге бағдарланған мамандарды даярлауға бағытталған.

Бейіндік докторантура аясындағы оқу мәдениет саласындағы басшылар мен мамандарға кәсіби құзыреттерін жетілдіруге, инновациялық басқару модельдерін әзірлеп, енгізуге, сондай-ақ саланың өзекті мәселелерін шешуге бағытталған қолданбалы зерттеулер жүргізуге мүмкіндік береді.

Білім беру бағдарламасының Жоғары білімнің бірыңғай платформасының Білім беру бағдарламалары тізіліміне енгізілуі оның кадрлар даярлау сапасына қойылатын мемлекеттік талаптарға сәйкестігін растап, өнер мен мәдениет саласы үшін жоғары білікті басқарушы мамандар даярлауға жаңа мүмкіндіктер ашады.