2025 жылғы қазан айында Қазақ ұлттық хореография академиясында білім алушылардың Академияның 2025–2035 жылдарға арналған Даму бағдарламасымен, сондай-ақ 2025–2026 оқу жылына арналған жылдық жұмыс жоспарымен танысуы бойынша кездесу өтті.

Кездесуді ғылыми жұмыс және стратегиялық даму жөніндегі директор, филология ғылымдарының докторы, профессор Жанна Толысбаева ашты. Өз сөзінде ол Академияның Даму бағдарламасы алдағы он жылға арналған стратегиялық бағыттарды айқындайтынын және білім беру, ғылыми және шығармашылық үдерістерді одан әрі жетілдірудің негізі болатынын атап өтті.

Кездесу барысында оқу орнының миссиясы, көзқарасы және даму басымдықтары таныстырылды. Олардың қатарында:

• көптілді білім беру ортасын қалыптастыру;
• білім беру үдерісін интернационалдандыруды дамыту;
• студенттердің шығармашылық әлеуетін ашу және қолдау;
• кәсіби даярлық барысында студенттердің белсенді азаматтық ұстанымын тәрбиелеу;
• әлеуметтік жауапкершілік пен көшбасшылық қасиеттерді қалыптастыру;
• студенттік бастамалар мен жобаларды қолдау;
• академиялық және шығармашылық ұтқырлықты дамыту және т.б.

Талқылау барысында студенттердің Академияның стратегиялық жобаларын жүзеге асырудағы рөліне ерекше назар аударылды. Кездесу қатысушылары өз сұрақтарын қойып, ұсыныстарын білдіріп, Академияның даму перспективаларын талқылау мүмкіндігіне ие болды.

Іс-шара қорытындысы бойынша студенттердің Даму бағдарламасын жүзеге асыру үдерісіне белсенді қатысуы оның табысты іске асырылуының маңызды факторы болатыны атап өтілді.

Қазақ ұлттық хореография академиясының 2025–2035 жылдарға арналған Даму бағдарламасы заманауи, бәсекеге қабілетті білім беру кеңістігін қалыптастыруға және хореографиялық өнер мен мәдениет саласында жаңа буынның жоғары білікті мамандарын даярлауға бағытталған.