Алматыда VII Халықаралық хореографиялық оқу орындарының «ӨРЛЕУ. Түркі билерінің жаңғырығы» фестивалі өтті. Орталық Азиядағы хореографиялық өнер саласындағы ең ірі мәдени-білім беру жобаларының бірі.

Биылғы фестиваль көрнекті ақын, Қазақстанның халық жазушысы Олжас Сүлейменовтің 90 жылдығына арналды.

Халықтардың мәдени бірлігі мен тарихи байланыстары тақырыбы түркі әлемінің ұлттық хореографиялық дәстүрлерін біріктірген жоба тұжырымдамасында көрініс тапты.

Фестивальге Түркия, Әзірбайжан, Өзбекстан, Қырғызстан, Башқұртстан, Саха Республикасы (Якутия) және Қазақстаннан делегациялар қатысты.

Фестиваль аясында Қазақ ұлттық хореография академиясы сахналық шеберлік ұлттық пластика мен музыкалық дәстүр байлығымен үйлескен мазмұнды әрі әсерлі шығармашылық бағдарламасын ұсынды.

Көрермендерге ерекше әсер қалдырған А. Садыкова мен А. Шамшиевтің хореографиясы, «Хассақ» фольклорлық-этнографиялық ансамблінің музыкасына қойылған «Серілер салтанаты» нөмірі болды. Қойылым қазақ биінің сұлулығы мен өзіндік ерекшелігін жеткізетін ішкі күшке, асқақтық пен динамикаға толы жарқын сахналық образ ретінде орындалды.

Сондай-ақ А. Шамшиевтің хореографиясындағы «TURAN» фольклорлық-этнографиялық ансамблінің музыкасына қойылған «Тастүлек» нөмірінің орындалуы да ерекше әсерлі болды. Бұл туындыда қозғалыс пластикасы, эмоциялық тереңдік пен сахналық энергия үйлесім тауып, ұлттық мәдениеттің рухына сіңген тұтас көркем дүние қалыптастырды.

Академия студенттерінің өнер көрсетуі жоғары орындаушылық мәдениетімен, әртістігімен және ұлттық нақыштың терең сезімімен ерекшеленіп, көрермендер мен фестиваль қатысушыларының шынайы ықыласы мен қызығушылығын тудырды.

Сонымен қатар, білім беру бағдарламасы аясында оқытушы Алмат Шамшиев қазақ биі бойынша шеберлік сабағын өткізді. Қатысушылар қазақ ерлер би өнерінің пластикасы, ырғақтық ерекшеліктері мен стилистикасымен танысып, негізгі қозғалыс элементтерін тәжірибе жүзінде меңгерді.