Бүгін Мемлекет басшысы Қасым-Жомарт Тоқаев Парламент Палаталарының бірлескен отырысында Қазақстан халқына жыл сайынғы Жолдауын жариялап, ел дамуының негізгі бағыттарын атап өтті. Президент өз сөзінде алдағы орта мерзімді кезеңге арналған басты міндеттерді белгілеп, Парламентке, Үкіметке және басқа да уәкілетті органдарға нақты тапсырмалар жүктеді. Мемлекет басшысы өз Жолдауында қазіргі қазақстандық қоғамның өмір сапасына әсер ететін барлық салаларды қамтыды.

Қазақстан Республикасының Президенті Қасым-Жомарт Тоқаев өз Жолдауында жаһандық өзгерістер жағдайында ел дамуының нақты стратегиялық бағытын айқындады. Бұл бастамалар қоғамда кең қолдау табуда, себебі олар Әділетті Қазақстан құруға, адами капиталды дамытуға, инновациялық технологияларды енгізуге және әлеуметтік тұрақтылықты қамтамасыз етуге бағытталған.

Мемлекет басшысының Қазақстанды цифрлық елге айналдыру бастамасын толық қолдаймыз. Жасанды интеллект және цифрлық даму министрлігінің құрылуы – тұрақты технологиялық экожүйені қалыптастыру жолындағы маңызды қадам. Бүгінде жасанды интеллектті дамыту — жай ғана үрдіс емес, бұл – уақыт талабы.

Жаңа ведомство еліміздегі цифрлық трансформация үдерістерін үйлестіріп, озық технологияларды енгізуге ықпал ететін болады, соның ішінде білім беру мен мәдениет салалары да бар. Біздің академия көпсатылы оқыту жүйесін іске асыратындықтан, цифрлық құзыреттер мен жасанды интеллект элементтерін мектеп қабырғасынан бастап енгізу аса маңызды, бұл ретте тәрбие жұмысына да ерекше мән берілуі қажет. Себебі біз мәдениет пен өнер саласындағы білім беру мекемесі болғандықтан, бұл жұмыс екі есе маңызды мәнге ие.

Жолдауда ғылым мен білім беруді дамыту мәселелеріне ерекше назар аударылды. Дарынды зерттеушілерді қолдау, білікті мамандарды елге қайтару тетіктерін әзірлеу, шетелдік кәсіби мамандарды тарту және олар үшін елімізде ұзақмерзімді жұмыс істеуге жағдай жасау қажеттігі айтылды.

Президент технологияның жедел даму жағдайында мәдениет пен өнерді сақтау және дамыту маңыздылығын атап өтті. Ол өнер қайраткерлері жаңа шынайылыққа бейімделіп, цифрлық құралдарды пайдалана отырып, қазақ мәдениетін шетелге насихаттауы тиіс екенін айтты. «Өнер адамдары дәстүріміз бен мәдениетімізді шетелге танытып жүр. Бұл – құрметке лайық жұмыс. Алайда олар уақыт талабына бейімделуі қажет», – деді Мемлекет басшысы.

Сондай-ақ Президент патриотизм ұғымының бүгінгі таңда кеңейгенін атап өтті. Ол тек тіл мен дәстүрді білумен шектелмей, ел өміріне белсене қатысу, қоғамға қызмет ету және заңдарды сақтау сынды ұғымдарды да қамтиды.

Парламенттік реформаларға – бір палаталы Парламент құру бастамасына ерекше назар аударылды. Бұл – саяси реформалардың заңды жалғасы. Бұл өзгеріс – Әділетті Қазақстан құру жолындағы ауқымды бағыттың бір бөлігі, оның негізгі қағидаттары – ашықтық пен тиімділік. Президенттің айтуынша, бұл реформа азаматтық секторда, сарапшылар арасында және, әрине, қазіргі Парламентте жан-жақты талқылануы қажет. Осы кең ауқымды талқылаудан кейін 2027 жылы бұл мәселені бүкілхалықтық референдум арқылы шешуді ұсынды, өйткені тағдырлы шешімдер тек халықтың келісімімен қабылдануы тиіс.

Президент Қазақстанның шет мемлекеттермен достық әрі өзара тиімді қарым-қатынас орнату бағытын жалғастыратынын атап өтті. Халықаралық қауымдастық еліміздің тұрақтылығын, ашықтығын және стратегиялық маңызын жоғары бағалап отыр.

Осылайша, Қасым-Жомарт Тоқаевтың Қазақстан халқына арнаған бүгінгі Жолдауы жаңа оқу жылының басталуын ғана емес, сонымен қатар таяу болашаққа арналған нақты бағытты – жоғары білікті кадрларды даярлау мен білім беру және мемлекеттік мекемелердегі патриотизмді нығайту бағытын айқындады. Қазақ ұлттық хореография академиясы бұл бастамаларды толығымен қолдайды және елдің мәдени-әлеуметтік дамуына зор үлес қосуға дайын білікті мамандарды даярлау ісіне өз үлесін қосуда. Біз бәріміз бірге әрбір Қазақстан азаматы үшін әділетті және тұрақты болашақ құрамыз.