Құрметті оқытушылар мен қызметкерлер!

Қазақстан Республикасының «Ғылым және технологиялық саясат туралы» Заңының 31-бабына сәйкес, ғылым мен техниканың дамуына үлес қосқан ғалымдарды, ғылыми ұйымдар мен жоғары және (немесе) жоғары оқу орнынан кейінгі білім беру ұйымдарының ғылыми қызметкерлерін ынталандыру мақсатында Қазақстан Республикасының Ғылым және жоғары білім министрлігі (бұдан әрі – Министрлік) "Жылдың үздік ғылыми қызметкері" жыл сайынғы сыйлығына байқау жариялайды.

Байқауға қатысу үшін өтінімдер Министрліктің ақпараттық жүйесі арқылы https://scicontest2024.iac.kz электрондық форматта қабылданады. Өтінімдерді қабылдау мерзімі – байқау туралы хабарландыру жарияланған күннен бастап 20 күнтізбелік күн.

Премияны тағайындау үшін үміткердің ғылыми жетістіктері келесі көрсеткіштер бойынша бағаланады:

• Қазақстан Республикасында танылған ғылыми дәреженің болуы;
• Уәкілетті орган берген ғылыми атағының болуы;
• Таңдалған ғылыми бағыт бойынша ғылыми жобалар мен бағдарламаларды басқару;
• Таңдалған ғылыми бағыт бойынша ғылыми нәтижелердің болуы және сапасы (рецензияланған журналдардағы мақалалар немесе шолулар, отандық және шетелдік монографиялар, монография тараулары, патенттер және басқалары);
• Жетекші шетелдік ғалымдармен бірлесіп, беделді халықаралық рецензияланған журналдарда мақалалардың болуы;
• Соңғы жылы жоғары оқу орнында бір немесе бірнеше пәндерді оқыту тәжірибесі;
• PhD немесе бейіндік доктор дәрежесін алған кадрларды даярлау;
• Өндіріске енгізілген ғылыми және ғылыми-техникалық қызмет нәтижелерінің болуы;
• Ғылыми зерттеулердің сапасын, нәтижелілігін және ықпалын арттыруға бағытталған қоғамдық жұмыстар.

Қосымша:

• Министрдің 2021 жылғы 2 қарашадағы № 544 бұйрығы «Жылдың үздік ғылыми қызметкері» жыл сайынғы сыйлығын тағайындау ережелерін бекіту туралы (Қазақстан Республикасының Әділет министрлігінде 2021 жылғы 3 қарашада № 25003 тіркелген) – https://adilet.zan.kz/rus/docs/V2100025003
• 2024 жылғы "Жылдың үздік ғылыми қызметкері" сыйлығын тағайындауға үміткердің ғылыми жетістіктерін бағалаудың сапалық және сандық көрсеткіштері.