2024 жылғы 1-30 қазан аралығында 8D02108 – «Хореография» білім беру бағдарламасының үшінші жыл докторанты Нигяр Шахмурадова Баку хореография академиясында шетелдік ғылыми тағылымдамадан өтті. Тағылымдама барысында ол кафедра профессоры, педагогика ғылымдарының кандидаты, доцент Людмила Гасанованың ғылыми жетекшілігімен жұмыс жүргізді.

Нигяр Шахмурадованың диссертация тақырыбы – «Азербайжан хореографиялық өнерінің дамуы контексіндегі ұлттық және классикалық бидің синтезі (ХХ ғасырдың ортасы – ХХІ ғасыр)». Тағылымдама барысында ол Академиялық опера және балет театрының ардагер әртістерімен және жетекші балет солистерімен, сондай-ақ Азербайжанның Мемлекеттік ансамблі мен Мемлекеттік ән және би ансамблінің солистерімен кездесіп, сұхбат жүргізді. Бұл кездесулер докторлық диссертация үшін бірегей материалдар жинауға, сондай-ақ елдегі хореографиялық өнердің тарихы мен эволюциясын тереңірек түсінуге мүмкіндік берді.

Нигяр Шахмурадова тағылымдама барысында Орал хореография колледжінің педагогы Ксения Хомутованың шеберлік сабақтарына ерекше назар аударды. Классикалық би, заманауи би және балет гимнастикасы бойынша сабақтар оның әдістемелік білімін кеңейтіп, практикалық дағдыларын дамытуда маңызды тәжірибе болды. Ксения Хомутованың сабақтарында ол авторлық оқыту әдістерімен, классикалық техника мен заманауи хореография элементтерін біріктіру ерекшеліктерімен, сондай-ақ балет әртістерінің физикалық дайындығын жетілдіру жолдарымен танысты.

Докторанттың ғылыми шетелдік кеңесшісі – өнертану ғылымдарының докторы, Баку мемлекеттік университетінің профессоры Мина Тельманқызы Гаджиева болды. Оның қолдауы тағылымдаманың жоғары ғылыми құндылығын қамтамасыз етті.

Нигяр Шахмурадованың шетелдік тағылымдамасы оның ғылыми зерттеулерін дамытудағы және кәсіби өсуіндегі маңызды қадам болып қана қоймай, хореография саласындағы халықаралық ғылыми ынтымақтастықты нығайтуға да ықпал етті.