«Тәрбиеші болу – балалардың өмірінің бір бөлшегі болу деген сөз»

Әрбір Академияның жетістігі – бұл көпшілікке көрінбейтін, бірақ біздің айналамыздағы жайлылық және сұлулықты жасауда маңызды рөл атқаратын көптеген адамдардың еңбегінің нәтижесі. «Біздің адамдар» жобасы – Академияны шабыттануға және шығармашылықпен айналысуға ыңғайлы орынға айналдыруға өз еңбектерімен үлес қосқан адамдардың оқиғалары.

«Тәрбиеші болу – балалардың өмірінің бір бөлшегі болу деген сөз»

«Біздің адамдар» жобасының кезекті шығарылымының кейіпкері – Дастан Нұршат Әбдімомынқызы, Қазақ ұлттық хореография академиясының интернат тәрбиешісі.

— Өзіңіз туралы және интернатта тәрбиеші болып жұмысқа қалай келгеніңіз туралы айтып берсеңіз?

Мен Тараз қаласынанмын, сол жерде мектепті бітіріп, педагог-психолог мамандығы бойынша білім алдым. Студенттік кезде кураторым маған үлкен қалада жұмыс істеуге кеңес берген еді. Осылайша, Астанаға көшіп келіп, Қазақ ұлттық хореография академиясының интернатында тәрбиеші болып жұмысқа орналастым. Шешімімді тез қабылдадым, содан бері балалармен жұмыс істеуді үлкен қуанышпен жалғастырып келемін.

— Академияда қанша уақыт жұмыс істеп келесіз?

Академия ашылған 2016 жылдан бері жұмыс істеп келемін. Осы жылдар ішінде Академия мен үшін екінші үйге айналды.

— Неліктен дәл осы мамандықты таңдап, шығармашылыққа ұмтылатын балалармен жұмыс істеуге қызықтыңыз?

Балаларды жақсы көру. Менің отбасымда көптеген педагогтар бар – аталарым мен әжелерім ұстаз болған, сондықтан бұл мамандық менің қанымда бар сияқты. Балалармен жұмыс істей отырып, олардың өсуіне көмектесіп, арман жолында қолдау көрсетіп, олардың үшін жайлы атмосфера қалыптастыра алатынымды сеземін.

— Академияда сіздің жұмыс күніңіз қалай өтеді?

Менің жұмысым балалардың тұрмысына байланысты, себебі интернат – бұл олардың екінші үйі. Мен оқу процесін, тамақтануды бақылап, түрлі мәселелерді шешуге көмектесіп, балалармен және олардың ата-аналарымен әңгімелесіп тұрамын. Сондай-ақ, іс-шаралар мен бос уақытты ұйымдастырып, балалардың тек оқумен ғана емес, Академиядағы уақыттарын қызықты өткізуіне жағдай жасаймын.

— Хореографиямен айналысатын балалармен жұмыс жасауда қандай ерекшеліктерді атап өтер едіңіз?

Балалардың бәрі- әрқашан ерекше. Әрқайсысымен өзіне тән әдіс-тәсілдермен жұмыс істеу маңызды, адал, мұқият және қамқор болу қажет. Хореографияны таңдайтындар ерекше тәртіпті, еңбекқор және эмоционалды түрде сезімтал. Оларға қолдау мен түсіністік қажет, себебі олардың жолы әрдайым жеңіл бола бермейді.

— Тәрбиеленушілердің шығармашылық әлеуетін дамытуда қандай әдіс-тәсілдер көмектеседі?

Шығармашылық әлеуетті дамыту үшін балалар өздерін қолдайтын ортада болуын маңызды деп санаймын. Мен олардың оқытушылармен, хореографтармен қарым-қатынасын нығайтып, қиындықтарды жеңуіне көмектесемін. Назар аудару, сенім және қатысу тәрбиешінің басты құралдары болып табылады.

— Балалармен жұмыс істеуде сізді не шабыттандырады? Қандай сәттерде сіз мақтаныш сезесіз?

Менің шабыттандыратын нәрсем – олардың қызығушылығы, белсенділігі және жанарларындағы от. Ең әсерлі сәттер – балалар мені көргенде олар мені құшақтап, өз сезімдерімен бөлісіп, күндері қалай өткенін айтып береді. Мен үшін олардың өмірінің бір бөлшегі болу өте маңызды. Ал сахнада оларды көру – мені үлкен мақтаныш сезімімен толтырады – олар кішкентай, бірақ өз қадамдарымен арманға жақындай түседі.

— Сізде қандай хобби бар?

Мен жіптен білезіктер тоқуды ұнатамын, кітаптар жинаймын және үлкен кітапхана ашуды армандаймын. Бос уақыттарымда сурет саламын, шетелдік студенттермен оңай араласу үшін ағылшын және жапон тілдерін үйренемін.

— Сіздің ең үлкен арманыңыз қандай?

Әр адам сияқты, менің де өз арманым бар. Ең алдымен, мен әлемде бейбітшілікті армандаймын. Бірақ мен үшін әрбір бала өз орнын тауып, өмірде және өнерде өз жолын таба алса деген тілек бар.

— Тәрбиеленушілерден қандай нәрселер үйренесіз? Балалар сізге жаңа бір нәрсе үйреткен кездер болды ма?

Әр күні мен балалардан жаңа нәрселер үйренемін, олар да меннен бірдеңе үйренеді. Олар маған сенім, шынайылық және өмірде көбірек қуаныш таба білуді үйретеді. Академияда тәрбиеші болғаннан кейін мен балет, өнер және мәдениет әлемін аштым. Бұл әлем мені де, менің тәрбиеленушілерімді де шабыттандырады.

Интервьюлер сериясы Қазақстан Республикасы Президенті Қасым-Жомарт Тоқаевтың «Жұмысшы мамандықтары жылы» аясында өткізілуде.