Студенттерге күнделікті істерде өнімділікті сақтауға арналған кеңестер

Биылғы оқу жылында студенттердің оқу орындарына қайта оралуына қарамастан, ағымдағы эпидемиологиялық жағдай әдеттегі өмір ырғағы (іс тәртібі, күн тәртібі және т.б.) мен әдеттегі ақпарат ағындарына қатты әсер етеді. Бұл абыржу мен алаңдаушылық сезімін тудыруы мүмкін.

Оқу процесін қалай тиімді ұйымдастыруға болатындығын қарастырайық.

Жаңа оқу жылында дәрісханада оқумен қатар қашықтықтан оқуды ұштастыру қажет. Мұндай өзгеріс ашуланшақтықтың жоғарылауына, көңіл-күйдің нашарлауына әкелуі мүмкін, бұл нәтижелі оқуға қолайлы емес. Өзіңіз бақылай алатын нәрседе сенімділік пен дәйектілікті қалыптастыру маңызды. Мысалы, бұл күн тәртібі болуы мүмкін: бір уақытта тұру және ұйықтау, тамақтану, оқу және демалу уақытын бақылау.

Өзіңізге тым жоғары мақсаттар қоймаңыз, мүмкін сіздің өнімділігіңіз әдеттегіден төмен болып қалар. Өзіңіз байқамасаңыз да, елеңдеу, неғұрлым қатаң гигиеналық ережелердің сақталуын қадағалау, денсаулыққа (өзіңіздің, айналаңыздағылардың, жақындарыңыздың) үнемі назар аудару қатты шаршатады. Өзіңізге құнттап қараңыз, бірдеңе қолыңыздан келмей жатса, өзіңізді кінәламаңыз. «Бәрі жақсы!», «Мен жетістікке жетемін!» деген және т.б. позитивті фразалар арқылы өзіңізге қолдау көрсетіңіз.

Ұзақ мерзімді жоспарлар құру адамға жағымды сезімдер береді. Дәл қазір жоспар құру – әсіресе маңызды. Сондықтан, болашағыңызға назар аударып, нені өзгерткіңіз, нені үйренгіңіз келетінін, не істеу керектігін анықтап, осы бағытта алғашқы қадамдарды жасай бастасаңыз, өте жақсы болады.

Ұзақ мерзімді жоспарлардан басқа, өмірге тұрақтылық сезімін қысқа мерзімді жоспарлар да әкеледі. Бірнеше күнге алын-ала жоспар жасаңыз. Қашан кімге қоңырау шалатыныңызды, не істейтініңізді ойластырыңыз.

Егер сізді әртүрлі қорқыныштар, мазасыз ойлар мазалап жүрсе, defusion (когнитивті ажырату) әдісін қолданыңыз – өз ойларыңыздан ажырап, бақылаушы позициясын алыңыз. Өзіңізге: «Мм, қандай қызық ой. Әрине, қорқынышты ақпараттардың осынша көп болғандығынан, ол ой басыма келеді. Маған келгенің үшін саған рахмет, бірақ мен басқа нәрселермен айналысқым келеді». Ең бастысы, қорқынышты ойларды өзіңізден қууға, «олар туралы ойламауға» тырыспаңыз. Бұл оларды тек күштірек қылады. Олардың сізге мезгіл-мезгіл келетінін қабылдап, оларды ақырын қайта бағыттауыңыз керек.

Мазасыздық сізді жаулап алмау үшін алдын ала әрекеттер тізбегін ойластыру керек. Бұнымен сізге жаттығу, йога, медитация жасау көмектеседі, біз қалыпты жағдайда қолданатын барлық босаңсу әдістері көмектеседі.